Biodrivstoff: Auka omsetningskrav for 2026 og 2027

Regjeringa har vedteke å auke omsetningskrava for vegtrafikk, andre formål, sjøfart og luftfart. Dei vedtekne krava for 2026 og 2027 er:

Kravet i vegtrafikk aukar frå 19 til 20 prosent i 2026 og til 21 prosent i 2027.
Kravet i andre formål aukar frå 10 til 11 prosent i 2026 og til 12 prosent i 2027.
Kravet i sjøfart aukar frå 6 til 7 prosent i 2026 og til 8 prosent i 2027.
Kravet i luftfart aukar frå 0,5 til 2 prosent i 2026 i tråd med EU sitt omsetningskrav for luftfart.

Omsetningskrava for andre formål, sjøfart og luftfart kan framleis berre oppfyllast med vedlegg V-biodrivstoff (avansert biodrivstoff eller biodrivstoff basert på B-råstoff). Delkravet i vegtrafikk til vedlegg V-biodrivstoff aukar til høvesvis 13,5 prosent i 2026 og 14,5 prosent i 2027. Det vil framleis vere høve til å nytte konvensjonelt biodrivstoff utover delkravet i vegtrafikken og å dobbelttelje vedlegg V-biodrivstoff utover delkravet.

Regjeringa har òg vedteke å innføre eit delkrav til avansert biodrivstoff for vegtrafikk, andre formål og sjøfart. Delkravet er satt til 1 prosent i 2026 og 2 prosent i 2027. Eit delkrav til avansert biodrivstoff vil bidra til å fremje umodne produksjonsteknologiar for biodrivstoff og å forbetre den globale klimaeffekten av omsetningskrava.

Endringane er gjeldande frå 1. januar 2026.

Miljødirektoratet har rettleiing for klassifisering av råstoff til produksjon av biodrivstoff. Her kan omsettarar søke til Miljødirektoratet om rettleiing på klassifisering av råstoff som ikkje er vurdert tidlegare.

Biodrivstoff laga av ulike typar råstoff

Konvensjonelle biodrivstoff er laga av råstoff som òg kan brukast til å produsere mat eller dyrefôr (hovudsakeleg landbruksvekstar), som raps og palmeolje. Konvensjonelt biodrivstoff omfattar òg biodrivstoff laga av enkelte biprodukta frå industriprosessar. Bruk av konvensjonelt biodrivstoff er forbundet med risiko for avskoging og auka globale utslepp. 

Avanserte biodrivstoff er biodrivstoff laga av eit breitt spekter av teknologisk umodne råstoff, som avfall, restar og biprodukt frå næringmiddelindustri, landbruk, skogbruk og trebasert industri, og enkelte energivekstar. Alle råstoffa er gitt i del A i ei liste i vedlegg V til produktforskrifta kapittel 3. Døme er matavfall, halm, tallolje og treflis frå treindustri og algar. Desse råstoffa er generelt tilknytt liten risiko for avskoging og auka globale utslepp, fordi dei er umodne råstoff som har færre eksisterande bruksområde. Slike råstoff er relativt kostbare å utnytte til biodrivstoff og har behov for vidare teknologi- og verdikjedeutvikling. 

Biodrivstoff laga av råstoff på del B-lista i vedlegg V (B-råstoff) er modne råstoff basert på avfall og restar. Per i dag er det berre animalsk feitt kategori 1 og 2 (animalsk feitt som er ueigna til mat eller dyrefôr) og brukt frityrolje som er på B-lista. Dette er råstoff som blir utnytta i stor skala i dag, og som blir omdanna til biodrivstoff med moden teknologi. Biodrivstoff laga av B-råstoff har ein viss risiko for avskoging og auka globale utslepp. Høg etterspurnad etter B-råstoff gir disse høg økonomisk verdi, og det er òg risiko for bedrageri med feilmerking av råstoffa. Det er til dømes krevjande å kontrollere at brukt frityrolje som blir brukt til biodrivstoffproduksjon faktisk er brukt.

Definisjonen av avansert biodrivstoff i produktforskrifta blei endra 1. januar 2025 frå å omfatte biodrivstoff laga av A- og B-råstoff, til å kun omfatte biodrivstoff laga av A-råstoff. Avansert biodrivstoff og biodrivstoff laga av B-råstoff omtalast som vedlegg V-biodrivstoff.