Statens naturoppsyn aukar bemanninga i distrikta
Statens naturoppsyn (SNO) opprettar seks nye stillingar i Finnmark, Troms og Nordland.
I statsbudsjettet for 2024 gav regjeringa ti millionar kroner for å styrkje Statens naturoppsyn i Finnmark, Troms og Nordland. Hovudårsaka er stor arbeidsmengd knytt til rovviltarbeid.
– Dette vil styrkje kapasiteten vår i nord stort. I dag har vi berre eitt naturoppsyn på dei seks lokasjonane som no aukar bemanninga med ein person, og alle stadene har store arbeidsmengder knytt til rovvilt, seier Morten Kjørstad, direktør i SNO.
Dei seks lokasjonane er Kautokeino og Lakselv i Finnmark, Nordreisa og Bardu i Troms, og Narvik og Saltdal i Nordland.
Lokalt naturoppsyn
I vedtaket frå Stortinget heiter det:
"Stillingane skal primært bidra til å auke kapasiteten hos naturoppsynet til bestandsovervaking av rovvilt og skadedokumentasjon i regionen".
Utover oppgåver knytt til rovviltforvaltning har SNO også ansvar for å utøve kontroll, tilsyn, gi informasjon og rettleiing, i tillegg til registrering, dokumentasjon, skjøtsel og tilrettelegging. SNO fører også tilsyn med verneområda i landet.
Dei nyoppretta stillingane vil bli lyst ut med det aller fyrste.