Opnar for direktekjøp av internasjonale klimakvotar
Noreg opnar for å kjøpe klimakvotar direkte frå prosjekt i utviklingsland. Kjøpa skal bidra til at Noreg når klimamåla sine.
Parisavtalen opnar for at land kan samarbeide om å redusere utsleppa sine. Noreg nyttar seg av denne moglegheita gjennom kjøp av klimakvotar frå prosjekt i utviklingsland og går no ut med ei utlysing for å få inn prosjektforslag.
No kan prosjektutviklarar sende inn forslag til slike prosjekt direkte til Miljødirektoratet, som på oppdrag frå Klima- og miljødepartementet skal vurdere kva prosjekt Noreg bør gå vidare med. Miljødirektoratet får med dette ei ny oppgåve i Noregs internasjonale klimaarbeid.
– Vi skal bruke den klimafaglege kompetansen vår til å vurdere prosjekt som kan gi utsleppsreduksjonar. Vår vurdering vil danne grunnlaget for kva prosjekt Klima- og miljødepartementet vil gå vidare med, seier direktør Hilde Singsaas i Miljødirektoratet.
Bidreg til utsleppsreduksjonar i andre land
Noregs klimamål under Parisavtalen kan nåast gjennom utsleppsreduksjonar i Noreg, i samarbeid med EU og gjennom kjøp av utsleppsreduksjonar utanfor EU. Kjøpa utanfor EU skjer under Parisavtalens artikkel 6, som gjer det mogleg for land å samarbeide om utsleppsreduksjonar.
Kjøp av klimakvotar internasjonalt skal bidra til at Noreg når klimamåla sine.
For å unngå at same utsleppsreduksjon blir tald to gonger, må landet der utsleppskuttet skjer, godkjenne at det blir overført til Noreg og justere sine eigne utslepp tilsvarande.
Kjøpa skal bidra til utsleppsreduksjonar som elles ikkje ville ha skjedd, såkalla addisjonalitet. Miljødirektoratet skal mellom anna vurdere integriteten og kvaliteten på prosjekta, kor sannsynleg det er at prosjektet faktisk leverer utsleppsreduksjonane og pris.
Ei brei utlysing av internasjonale klimakvotar
Prosjekta må vere i land som står på OECDs liste over bistandsmottakarar. Dei fleste sektorar kan omfattast, men Noreg vil mellom anna ikkje kjøpe kvotar frå olje- og gassaktivitetar, reduksjon av HFK-23, reduksjon av N2O frå produksjon av adipinsyre eller frå skogprosjekt og andre naturbaserte løysingar.
Utlysinga gjeld prosjekt som kan levere minst 300 000 tonn CO₂-ekvivalentar i perioden 2027–2035. Prosjekt som bidreg med utsleppsreduksjonar innan 2030, vil bli prioritert.
Utlysinga er ein del av regjeringas Initiativ for globale utsleppsreduksjonar (NIGU), som blir brukt til norske kjøp av utsleppsreduksjonar under Parisavtalens artikkel 6.
Søknadsfrist for prosjekt er 20. januar 2027.