Brukarrettleiing for Enkelt søk i Naturbase

Om datasetta

Naturvernområde

Datasettet viser område som er oppretta for å ta vare på naturmangfaldet og dei økologiske prosessane. Ivaretaking skal skje gjennom berekraftig bruk og vern, også med tanke på menneskeleg verksemd, kultur, helse og trivsel, og som grunnlag for samisk kultur.

Verneområda blir forvalta av fylkesmenn, kommunar eller av eigne nasjonalpark-/verneområdestyre. Det viktigaste lovgrunnlaget for å etablere verneområde er naturmangfaldlova, men også andre heimlar er nytta.

Føreslegne naturvernområde

Datasettet viser område som er under planlegging for vern. Områda er kunngjort etter reglane i naturmangfaldlova, og avgrensinga i høyringsforslaget er nytta i datasettet.

Når vedtak om vern av området er gjort av Kongen i statsråd, blir området flytta til datasettet Naturvernområde. Høyringsprosessen og handsaminga etter høyring kan gje endringar i avgrensinga.

Verdifulle kulturlandskap

Datasettet viser høgt prioriterte kulturlandskapsområde med både biologiske og kulturhistoriske verdiar, også med tanke på tiltak for å oppretthalde eller forbetre tilstanden.

Datasettet omfattar mellom anna dei høgast prioriterte områda i Nasjonal registrering av verdifulle kulturlandskap, totalt ca. 300 område i landet.

Utvalde kulturlandskap

Datasettet viser område som inngår i satsing Utvalde kulturlandskap i jordbruket. Denne skal sikre langsiktig forvalting landskapsområde med særs store biologiske og kulturhistoriske verdiar, forma av langvarig og kontinuerleg tradisjonell bruk.

Arbeidet er tufta på samarbeid mellom grunneigarar og drivarar og styresmaktene. Satsinga er eit spleiselag mellom landbruks-, natur- og kulturminneforvaltninga i Noreg.

Naturtypar – DN-handbok 13

Datasettet viser naturtypelokalitetar på land og i ferskvatn, kartlagt etter DN-handbok 13. Kvar lokalitet er registrert med ein naturtype.

I handboka er definert kva for naturtypar som er prioriterte for kartlegging, og kriteria for verdisetjinga er også fastsett der. Lokalitetane er vurdert som særs viktige (A), viktige (B) og lokalt viktige (C) for biologisk mangfald.

Naturtypar – DN-handbok 19

Datasettet viser naturtypelokalitetar i kystnære marine område, kartlagt etter DN-handbok 19. Kvar lokalitet er registrert med ein naturtype.

I handboka er definert kva for naturtypar som er prioriterte for kartlegging, og kriteria for verdisetjinga er også fastsett der. Lokalitetane er vurdert som særs viktige (A), viktige (B) og lokalt viktige (C) for biologisk mangfald.

Naturtypar – Miljødirektoratets instruks

Datasettet viser naturtypelokalitetar kartlagt etter Miljødirektoratets instruks på land. Naturtypar prioriterte for kartlegging er trua eller nær trua naturtypar (Norsk raudliste for naturtypar), naturtypar som har sentral økosystemfunksjon og spesielt dårleg kartlagde naturtypar.

Kvar lokalitet er gitt ein økologisk kvalitet, basert på ei vurdering av tilstand og naturmangfald. Det faglege innhaldet er dokumentert ved bruk av type- og beskrivingssystemet Natur i Norge.

Kartlegging av naturtypar etter Miljødirektoratets instruks vil avløyse kartlegging etter DNs handbøker som metodikk i samband med konsekvensutgreiingar og liknande.

Kartlagde og verdsette friluftslivsområde

Datasettet viser område som er kartlagde og verdsette med tanke på allment friluftsliv. Kvart område er kategorisert med områdetype og verdi, og ein finn informasjon om kva for vurderingar som er gjort i verdsetjinga.

Statleg sikra friluftslivsområde

Datasettet viser område som er sikra for allment friluftsliv med statleg hjelp, inkludert informasjon om tilretteleggingstiltak m.m. Hovudregelen er at slike område har ein funksjon som krev tilrettelegging, og/eller at bruken er såpass omfattande at han går ut over rammene for allemannsretten.

Felles for områda i datasettet er at staten har ein formell råderett over arealet. Kommunar eller interkommunale friluftsråd har ansvaret for dagleg drift og tilsyn, informasjon og praktisk skjøtsel av områda.

Ramsarområde

Datasettet viser norske naturvernområde med status som ramsarområde, under den internasjonale Ramsarkonvensjonen. Statusen som ramsarområde kan gjelde delar av eit naturvernområde, altså ikkje heile verneområdet.

Eit ramsarområde kan også omfatte areal i fleire naturvernområde. I faktaarket til kvart ramsarområde ligg lenke til omtalen av området på nettsidene til Ramsarkonvensjonen.

Tips til bruk

• Marker datasettet du vil sjå på, og du får ei treffliste med heile innhaldet i datasettet.
• Trefflista viser 100 treff per side. Frå områdenamnet kan du opne faktaarket for området. Du kan sortere trefflista ved å klikke på overskriftene. Lange trefflister er vanskelege å handtere i løysinga.
• Du får ei kortare trefflista ved å filtrere. Filtreringsboksane inneheld alt du kan velje for den aktuelle boksen. Skriv gjerne i søkefeltet viss lista er lang.
• Dei kriteria du har valt, kjem opp i løysinga, og dei kjem også opp i adressefeltet i nettlesaren. Du kan ta vare på ei filtrering ved å kopiere lenka i adressefeltet.
• Løysinga fjernar generelt ikkje moglege val i andre filtreringsboksar med utgangspunkt dei vala du allereie har gjort. Mange moglege kombinasjonar av filtrering vil gi null treff. Eit unnatak er at berre kommunar med data i datasettet kan veljast når du har valt fylke. Kommunar utan data vil ikkje bli vist.
• Du kan laste ned trefflista i Excel regneark. Ønsker du berre sjølve trefflista, klikkar du på "Last ned i Excel". Ønsker du alle eigenskapar som høyrer til datasettet, klikkar du på "Last ned i Excel med alle felter".
• Alle trefflister kan lastast ned, men lange trefflister vil ta tid. Nedlastingsfarta vil også variere med kor bra nettverk du har.
• Eksportane kjem ut som zip-fil. Opne fila, og du finn regnearket som er resultatet av eksporten.
• Du kan bruke data i saksframstillingar, som grunnlag for diagram osb. Ved vidare bruk må du vise til Miljødirektoratet som kjelde.

Rettar og plikter ved bruk av data

Data som er publisert i denne tenesta, er opne data som du kan bruke fritt. Data er publisert under ein open lisens. Vilkår for bruk kan oppsummerast slik:

Du har lov til å:

• Kopiere data og gjere dei tilgjengelege.
• Setje saman data på nye måtar og/eller setje saman med andre datasett.
• Kopiere og gjere tilgjengeleg ein endra eller samansett versjon.
• Nytte data i kommersiell verksemd.

Vilkåra er:

• Du skal vise til Miljødirektoratet som kjelde.
• Har du gruppert innhald på nye måtar, gjort spesifikke utval og liknande, skal du ikkje publisere dette på ein måte som indikerer at Miljødirektoratet går god for dette eller anbefaler deg eller din bruk av datasettet.
• Du skal ikkje bruke data slik at framstillinga kan vere villeiande, og du skal heller ikkje fordreie eller gi ei uriktig framstilling av data.

Ver merksam på at:

• Miljødirektoratet fråskriv seg alt ansvar for kvalitet og innhald i data, og kva informasjonen blir brukt til.
• Data som inneheld personopplysningar ikkje er omfatta av denne lisensen og ikkje kan vidarebrukast.

Norsk lisens for offentlege data (NLOD)

Datasett i Enkelt søk i Naturbase er publisert under Norsk lisens for offentlege data (NLOD). Teksten over er i stor grad henta direkte frå rettleiinga til Digitaliseringsdirektoratet.